What is Louis Vuitton?

Энэ удаа та бүхэндээ Louis Vuitton-н талаар бодлоо хуваалцахаар шийдлээ.

1. Загварийн ертөнцийн талаар.

Брэнд хувцас, тансаг хэрэглээ гэхээр анх цөөхөн хэдэн баячууд захилагаар оёулж өмсдөг байж, 100-аад жилийн өмнө. Маш бага хүрээнд хийгддэг байсан тусгай захиалгийн брэндууд өсөн томорч, нөгөө талаас зах зээл улам гүнзгийрэн хөгжиж үйлдвэрлэлийн тоног төхөөрөмж сайжирч, гадаад худалдаа тэлж, глобалчлагдан ажиллах хүч, түүхий эдийн олдоц, боломж сонголтууд гарч өнөөгийн төрхөө олсон.

Өнөөгийн дэлхийн загварын чиг хандлагыг тодорхойлж байдаг нийт 160-аад гол брэнд байдаг. Бүх брэндүүд өөр өөрийн гэсэн өвөрмөц стиль, онцлогтой. Эдгээр брэндүүд жилд 2 удаа том загварын шоунууд хийж ирэх улирлын хувцсаа танилцуулдаг. Загварын долоо хоногийн хөтөлбөрийн хувьд жил бүрийн 1-3 сард тухайн жилийн намар, өвлийн загвар, 9-11 сард ирэх жилийн хавар, зуны загварыг урлаг, соёл загварын томоохон төвүүд болох New York, London, Milan, Paris хот гэсэн дарааллаар танилцуулна. Мөн нэг их түгээмэл биш ч амралтын (resort) коллекц, Haute couture коллекц бас танилцуулагддаг.

Сүүлд Бразилын Сан Пауло, Японы Токио хотууд загварын долоо хоног зохиогдох болсноор уг жагсаалтад нэмэгдсэн. Гэхдээ жирийн хүмүүст Сан Пауло, Токио-н брэндүүд нэг их түгээмэл байдаггүй. Брэндүүд хувцасаа үзүүлж дуусаад зах зээлд гарах хүртэл ерөнхийдөө маркетинг, зар сурталчилгааны ажил хийнэ. Бараагаа сурталчилж хэвлэлд ярилцлага өгөх, нэр нөлөө бүхий одуудад бараагаа сурталчилгааны зорилгоор үнэгүй тараах, худалдааны гэрээгээ байгуулах, дараагийн улирлын хувцсаа хийх гээд олон ажил амжуулна. Фэйшний зах зээлд загварийн хандлагийг тодорхойлогч брэндүүд, тэдгээрийг дагаж масс-д зориулж үйлдвэрлэдэг брэндүүд зэрэгцэн оршдог. Брэнд болгонийг хүн бүр мэддэггүй ба масс-д мэдэгдэх шаардлагагүй, масс-аас дээд зэрэглэлийн үйлчлүүлэгчидийн хүрээнд үйл ажиллагаагаа явуулдаг, Фэйшнийг голлон тодорхойлж буй брэндүүд байдаг.

2. Louis Vuitton Дэлхийн загварийн хаан уу?

Хэдийгээр 160 гаруй брэнд улирал бүр загвараа үзүүлдэг ч яагаад зарим брэндийг хүмүүс илүү мэддэг вэ гэвэл тухайн брэндийн хэрэглэгчдийн зах зээл, мөн зар сурталчилгааны үйл ажиллагаатай холбоотой. LV-н хувьд анх ширэн эдлэл, аялалын чемодан цүнхээр гарч ирсэн франц брэнд. Нилээн олон жилийн түүхтэй хуучны брэндүүдийн нэгт орно. Тухайн үед адил зиндаанд байсан олон сайн брэнд бий. Тэдгээрээс LV маркетингтаа илүү анхаарал хандуулснаараа онцлоготой. Брэндийг мундаг, сул гэж ангилахаасаа загварийн ертөнцөд хэр байр суурьтай байна, Фэйшнийг хэрхэн хөгжүүлж байна гэдгээр нь авч үздэг.

Ихэнх хүмүүс Chanel, Dior, Gucci, LV, D&G зэргийг мундаг брэнд гэж ойлгодог. Эдгээр брэндүүд бол хамгийн гоё тансаг хувцастай нь бус рекламандаа хамгийн их анхаарал, мөнгө зарцуулдаг брэндүүд юм. Брэнд цүнхний өвчинг эдгээр брэндүүд холливуудын оддыг ашиглан хөөрөгдөж байсан билээ.

Загварийн Брэндүүдийг дотор нь брэндинг гэсэн категорт ангилвал 2 төрлийн брэнд байдаг:

- Эхний хэсэгт үнэхээр дизайн сайтай, артистик, шинийг эрэлхийлсэн чанараа алдаагүй, авангард тал руугаа ч гэмээр, зар сурталчилгаа их хөөцөлддөггүй (Японы Comme des Garcons, Бeлгийн Ann Demeulemeester гэх мэт). Иймэрхүү брэндүүд өөрсдөө материалаа боловсруулж, туршлагатай оёдолчдоор оёулдаг, мөн хийгдэх тоо ширхэг цөөн болохоор яалт ч үгүй нэгж барааны үнэ нь өндөр байдаг.

- Хоёрдугаар хэсэгт нэгэнт олсон нэр хүндээ ашиглан сурталчилж бэлэн хувцаснаас бус цүнх, гутал, нүдний шил, бүс, алчуур гэх мэт аксесуар зарж жинхэнэ ашгаа олдог брэндүүд. (Chanel, Dior, Gucci, LV, D&G гэх мэт) Эдгээр брэндүүдийн гол зорилго нь аль болох олон хувиар аксесуараа зарах. Хувцас нь бол зүгээр брэндээ одоо хүртэл байгааг мэдүүлэх, сенсаац тарьж масс-ийн анхааралыг татах зорилготой байдаг. Тиймдээ ч хувцас нь ихэвчлэн амьдрал дээр өмсөх боломж муутай, фантааз гоёл чимэг ихтэй байдаг. Жишээлбэл LV-н нэг торгон цамц $5000 байхад, цүнх нь $1000-с эхэлдэг. Уг нь пропорцын хувьд бодвол материалын хувьд үнэтэй, хэрэглээ ихтэйгээрээ цүнх илүү үнэтэй байх учиртай. Манайх хамгийн үнэтэй тансаг брэнд гэсэн ойлголт төрүүлж цүнхээ зарах нь гол бизнес. Мөн жинхэнэ $5000-н цамц авч өмсөх чадалтай үйлчлүүгчдээ бусад тансаг бараа хэрэглэхийг хүсэгчидтэй адил харагдуулахгүйн тулд Limited edition гэж $100.000 гарсан үнэтэй аравхан ширхэг цүнх гэх мэтийг хийж шоуддаг.

Ийм брэндүүд шинээр эдийн засаг нь өсч буй болон орлогийн шударга бус хувиарлалт эрчтэй явагдаж буй орнуудад хүчтэй рекламдан орж тэр хэсгийн мөнгийг хамаад, дараагийн зах зээл рүү орох бодлого барьдаг. Louis Vuitton эдийн засгийн уналттай байгаа Уругвай, Морокко, Вэнэсүэл, Украйн, Ирланд зэрэг улсуудад үйл ажиллагаагаа явуулж байна.

3. Надад Louis Vuitton хэрэгтэй юу?

Би хувьдаа Louis Vuitton-н цүнхгүй. Авч чадахгүйдээ биш, хэрэггүй болохоор, хэрэгцээнд таарахгүй болохоор тэр. Учир нь $1000-$2000-р цүнх авах хүний шүүгээнд тийм үнэтэй брэндүүдийн цүнхнүүд, $500-$5000-н брэнд хувцаснууд, аксесуарууд байх шаардлагатай. Мөн амьдралийнх нь хэв маягийг пропорцоор бодвол жилдээ 2 удаа дулаан орны арлуудаар аялчихдаг, энд тэндхийн арга хэмжээнд уригддаг, жил бүр хувцасаа шинэчлэдэг байх учиртай. Нэгэнт миний амьдралын хэв маяг одоогоор тийм биш болохоор тийм юм шиг харагдах гэж худлаа хичээхгүй. Тэгээд ч нөгөө талаар ямар нэг брэндийн лого гялалзуулж үнэгүй зарлалын самбар болж явах шиг онцгүй зүйл байхгүй.

Миний хувьд үндсэн хувцаснаас анхаарал сарниулахгүй, даруухан, сайн ширэн, нэг их том биш, нүсэр тоног багатай цүнхэнд дуртай. Мөн хүн бүрийн мэддэг брэнд биш бөгөөд хамгийн гол нь цацаж буй мессеж, амьдралын хэв маяг, амьдралыг үзэх үзэл нь минийхтэй тохирч буй брэндээ хэрэглэдэг.

Насандаа тохироогүй брэндийн зүйл хэрэглэх нь эмэгтэй хүнийг гутаадаг. Жаахан охин заавал хичээн барин үнэтэй 1000 доллар давсан цүнх барих утгагүй. Эд зүйлийн боол болж, эд зүйлээр өөрийнхөө дутууг нөхөхийг хүсэх бол өрөвдөлтэй сэтгэлгээ. Мэдээж үнэхээр сайн материалаар сайхан эсгэж оёсон хувцас өмсөх сайхан л даа. Брэнд, материал, өөрийн дуртай зүйлсээ мэдэж брэндийг хэрэглэх, мэдэхгүй олныг дагаж шуурах хоёрын хооронд том ялгаа бий. Нүүрээ зөв будаж, хүнтэй зөв харьцаж, наад захын дэлхийн соёл урлаг мэдэхгүй байж өөрт ахадсан брэнд хэрэглэвэл брэнд, хэрэглэж буй хүн хоёрын ялгаа гарч хөндлөнгийн хэнд ч мэдэгдмээр инээдтэй харагддаг.

4. Би ямар брэнд хэрэглэдэг вэ.

Миний хувьд "Comme des garcons" гэх мэт авангард төрлийн брэндүүд болон хөгжилтэй, ухаан зарсан, зөв пропорцтой хээтэй хувцастай Erdem, Dries Van Noten г.м брэндүүдэд дуртай. Өдөр тутам өмсөхөд бол Gap, Banana Republic, J.Crew гэсэн чанартай, классик загвартай брэндүүдийг сонгодог.

Цаашилбал Cacharel, Moschino cheap & chic, Diane Von Furstenberg, Marc by Marc Jacobs /Marc Jacobs нь LV-д Creative Director-р ажиллахаас гадна өөрийн хувийн Marc Jacobs, уг брэндийн хоёрдугаар зэрэг буюу залуучуудад зориулсан Marc by Marc Jacobs зэрэг брэндүүдтэй/, Vena Cava, Rag & Bone, APC гэх мэт брэндүүдийг өмсдөг. Сүүлийн жилүүдэд Alexander Wang, Vena Cava, Rodarte, 3.1 Philip Lim зэрэг брэндүүд эрчтэй гарч ирж загварын чиг хандлагыг тодорхойлж байна.

Photo: www.mongolia-web.com